Podemos Lugo reclama un compromiso firme contra as violencias machistas no 8M
Podemos Lugo presentou no Concello un requirimento institucional con motivo do 8M, Día Internacional das Mulleres, no que chama ao goberno local a asumir un compromiso real na loita contra as violencias machistas e pola igualdade efectiva. A iniciativa, promovida por Ximena Cheda Tuya, portavoz do Círculo e secretaria de Feminismos de Podemos Galicia, subliña a situación específica das mulleres en Lugo e a necesidade de fortalecer os recursos públicos destinados á súa protección.
Un dos eixos principais céntrase na Casa da Muller, o servizo municipal de atención a mulleres en situacións de violencia e desigualdade. Ao longo de 2023, este recurso atendeu polo menos unhas 1 000 consultas xurídicas, sociais e psicolóxicas, converténdose nun espazo esencial para o apoio integral. Con todo, desde agosto de 2025 a Casa da Muller permanece sen praza de psicólogo nin avogado especializado, pese a tratar casos de gran complexidade e vulnerabilidade, situación que partidos da oposición e colectivos sociais cualifican de falta de previsión que afecta directamente á calidade do servizo.
“Que un recurso fundamental como a Casa da Muller quede sen atención psicolóxica especializada non é algo menor. É unha falta de compromiso real coas mulleres de Lugo. A protección non pode depender de baixas sen cubrir ou de decisións administrativas”, subliñou Cheda.
A nota tamén fai fincapé na violencia dixital e na intelixencia artificial, alertando do aumento de agresións tecnolóxicas contra mulleres mediante redes sociais e ferramentas dixitais sen regulación nin perspectiva de xénero. “Estamos a ver imaxes manipuladas, vídeos falsos e campañas de acoso que usan a tecnoloxía para atacar e silenciar ás mulleres. Se non se actúa con normativa feminista e responsabilidade política, estas agresións multiplicaranse”, advertiu a portavoz.
Entre as propostas, Podemos Lugo apunta á consolidación dos Puntos Violeta nos eventos, ao apoio ás asociacións feministas da cidade, á promoción de políticas públicas de coidados e igualdade, e á petición á Xunta de Galicia e ao Parlamento galego para reforzar recursos como os CIM. “Non queremos políticas de escaparate. Queremos políticas que protexan, que garantan atención integral e igualdade de acceso en toda a cidade e a provincia”, concluíu Cheda.