Pol acollerá a IV Batida Feminina este sábado con máis de trinta mulleres participando
O Tecor Amigos da Natureza do Concello de Pol, coa colaboración da Federación Galega de Caza de Lugo, organiza este sábado, 17 de xaneiro, a IV Batida Feminina, unha cita que reúne a unha trintena de cazadoras de diferentes puntos da provincia nunha xornada de convivencia e actividade cinexética.
O evento, que continúa a medrar en participación ano tras ano, busca visibilizar o papel da muller no ámbito da caza e reforzar a presenza feminina nun sector tradicionalmente masculinizado. Na presentación da actividade, destacouse o compromiso das participantes e o apoio constante das entidades colaboradoras.
As persoas interesadas en inscribirse poden facelo a través do número de contacto facilitado pola organización. A xornada desenvolverase no propio tecor, nun ambiente de convivencia, respecto polo medio e posta en valor do labor das cazadoras galegas.