Ponte de Outeiro prepárase para unha nova edición da Festa da Troita
O vindeiro sábado 12 de abril, a localidade de Ponte de Outeiro, en Castro de Rei, acollerá a 10ª edición da Festa da Troita, un evento gastronómico e festivo que reunirá a veciños e visitantes nunha xornada chea de actividades.
A celebración comezará ás 14:00 horas cunha sesión vermú, seguida dun xantar popular e unha sobremesa amenizada polo dúo EPO-K a partir das 18:00 horas. Pola noite, a partir das 22:30 horas, a festa continuará cunha verbena a cargo da orquestra Fania Blanco Show e, ás 00:30 horas, a actuación de Eventec Cosmedeejay.
Ademais da música e da gastronomía, a festa contará cun Concurso de Pesca nas modalidades de lance, cebo e mosca. O venres 11 de abril terá lugar o sorteo de dorsais, mentres que o sábado 12 será a competición, que comezará ás 07:30 horas coa concentración dos pescadores. O concurso desenvolverase entre as 09:00 e as 13:00 horas, seguido dun xantar de irmandade ás 15:00 horas. A entrega de trofeos será ás 17:30 horas, e para rematar, haberá xogos populares.
Para aqueles que desexen participar no xantar, o menú inclúe xamón cocido, polbo, churrasco mixto con criollo, postre, café e licor. O prezo é de 30 euros para adultos, 15 euros para nenos de 7 a 11 anos e gratis para menores de 6 anos. As entradas están dispoñibles no Restaurante Cabuxo en Muimenta e na tenda de deportes A Chaira en Castro Ribeiras de Lea.