Portomarín abrirá o ximnasio municipal cunha xornada de portas abertas
O Concello de Portomarín anunciou a apertura do ximnasio municipal cunha xornada de portas abertas que terá lugar este sábado, 7 de febreiro, ás 18:00 horas. Esta actividade está dirixida á veciñanza co obxectivo de dar a coñecer as novas instalacións deportivas e facilitar información práctica sobre o seu uso.
Durante a xornada, as persoas asistentes poderán visitar o ximnasio e recibir explicacións sobre o funcionamento xeral do espazo, o sistema de acceso, as normas de uso, o mantemento das máquinas e os horarios dispoñibles. A iniciativa tamén servirá para aclarar calquera dúbida relacionada cos servizos que ofrecerá o ximnasio municipal.
Desde o Concello destacan que esta apertura pretende fomentar a práctica deportiva e promover hábitos de vida saudables entre a poboación, ao tempo que se garante un uso adecuado e responsable das instalacións desde o primeiro momento.