Portomarín impulsa un novo programa de verán para fomentar o envellecemento activo no rural
O Concello de Portomarín continúa a súa aposta por mellorar a calidade de vida das persoas maiores de 55 anos no rural a través do programa 'Verán Activo no Rural', que se desenvolverá entre o 30 de xuño e o 5 de setembro con actividades gratuítas ao aire libre.
O programa inclúe exercicios biosaudables, camiñatas, aquagym, talleres de macramé e outras propostas pensadas para promover o benestar físico e mental das persoas participantes. As actividades terán lugar nas parroquias de Bagude, Recelle, O Cruceiro e Portomarín, e están dirixidas exclusivamente a persoas maiores de 55 anos empadroadas no municipio.
As persoas interesadas poden anotarse no rexistro do Concello ou directamente o primeiro día da actividade. Desde o goberno local destacan que “seguimos a traballar para que os nosos maiores teñan acceso a programas que favorezan un envellecemento activo e saudable, fortalecendo ao mesmo tempo o tecido social do municipio”.