Portomarín promove un campamento de Semana Santa para nenos e nenas de 3 a 12 anos
O Concello de Portomarín organiza un campamento de Semana Santa dirixido a nenos e nenas de entre 3 e 12 anos co obxectivo de ofrecer unha alternativa de lecer educativo durante as vacacións escolares. A iniciativa pretende que os máis pequenos poidan pasar estas datas rodeados de amizades e participando en actividades pensadas para aprender mentres se divirten.
O campamento celebrarase os días 30 e 31 de marzo e o 1, 2, 3 e 6 de abril. Durante esas xornadas desenvolverase un programa de actividades que terá lugar entre as 10:00 e as 14:00 horas, mentres que tamén se habilitará un servizo de madrugadores entre as 08:30 e as 10:00 horas para facilitar a conciliación das familias.
As prazas están limitadas a un total de 30 participantes e o punto de entrega e recollida da rapazada será o Espazo Xuvenil de Portomarín. As persoas interesadas en participar deberán formalizar a inscrición antes do 23 de marzo.
Desde o Concello destacan ademais que este ano o campamento prestará servizo tamén nos días festivos do 2 e 3 de abril, co obxectivo de ofrecer ás familias unha alternativa lúdica e educativa que facilite a organización familiar durante o período de vacacións escolares.