Portomarín presenta un programa de Nadal cheo de actividades para todas as idades
O Concello de Portomarín deu a coñecer o seu Programa de Nadal 2025, unha proposta pensada para que toda a veciñanza, desde os máis pequenos ata as persoas adultas, poida desfrutar destas datas tan especiais. O municipio aposta un ano máis por combinar tradición, música, actividades para nenos e eventos culturais que encherán a vila de ambiente festivo e ilusión.
As primeiras actividades comezarán entre o 9 e o 23 de decembro, período no que estará en marcha o Concurso de Postais de Nadal, cun buzón habilitado na recepción do Concello para entregar as creacións participantes.
O día 10 de decembro terá lugar un dos momentos máis esperados: o Prendido das Luces de Nadal, que se celebrará ás 18:00 horas na Praza do Camiño, marcando o inicio oficial das festas.
Xa o 21 de decembro, os máis pequenos poderán participar nun Taller infantil de galletas, programado para as 16:00 horas no Gastrobroadoiro, unha actividade creativa e perfecta para entrar no ambiente natalicio.
O 24 de decembro será unha xornada especial coa Visita de Papá Noel, que estará na Praza do Camiño ás 12:00 horas. Ese mesmo día, entre as 17:00 e as 18:00 horas, celebrarase a tradicional ruta de Cantigas de Nadal polos bares do municipio.
O día 27 de decembro, ás 17:00 horas, o Nadal continuará no auditorio da Casa da Cultura co Festival de Nadal, no que participarán diferentes grupos e asociacións locais.
Cara ao final do ano, o 30 de decembro, ás 12:00 horas, a Casa da Cultura acollerá unha obra de teatro dirixida a público familiar.
O novo ano comezará mantendo a tradición: o 6 de xaneiro, ás 16:30 horas, terá lugar a ruta de Cantigas de Reis polos bares, e ás 18:00 horas desenvolverase a esperada Cabalgata de Reis, que percorrerá o municipio ata chegar á Igrexa de San Xoán.
Con este completo programa, Portomarín prepárase para vivir un Nadal cargado de maxia, convivencia e espírito festivo.