Presentada a Festa dos Ovos Rotos con Chourizo de Ribeiras de Lea
A Delegación Territorial da Xunta acolleu a presentación da III Festa dos Ovos Rotos con Chourizo e Feira de Artesanía organizada pola Asociación de Veciños de Ribeiras do Lea, en Castro de Rei, que se celebrará o vindeiro sábado, 13 de setembro. A Administración autonómica colabora coa cita.
O delegado territorial de Lugo, Javier Arias, xunto ao alcalde de Castro de Rei, Francisco Balado, e representantes do colectivo organizador deron a coñecer o programa, que ten como acto central un xantar popular baixo carpa.
Tamén haberá unha Máster Class sobre o prato protagonista da xornada impartida por Alejandro Méndez e Alejandro Ares, membros da Asociación de Cociñeiros de Lugo. Outra das actividades previstas é unha exhibición de cociña e degustación gratuíta de máis de 700 tapas elaboradas con ovo e chourizo.
Ademais, ao longo do día haberá actuacións musicais, feira artesanal con varios postos de artesanía alimentaria na que se promocionarán os produtos locais, talleres de oficios artesáns, exhibición de coches clásicos e xogos tradicionais.