Presentada a XX edición do Concurso de Tapas de Lugo, que se celebrará do 7 ao 23 de novembro

Máis de 40 establecementos participan neste certame gastronómico, que combina xurado popular e profesional e ofrece premios aos participantes

A concelleira de Cultura, Turismo e Promoción da Lingua, Maite Ferreiro, xunto coa concelleira de Educación e Difusión do Coñecemento, Iria Buide, e o presidente da Asociación Provincial de Empresarios da Hostalería e Turismo de Lugo (APEHL), Cheché Real, presentaron o cartel da XX edición do Concurso de Tapas de Lugo, que se desenvolverá entre o 7 e o 23 de novembro. Ferreiro destacou que nesta edición participarán “máis de 40 establecementos de hostalería de Lugo” e subliñou que o Concurso de Tapas é “o certame gastronómico máis importante da cidade”.

Durante o acto, Maite Ferreiro resaltou “a importancia do concurso de Tapas para a cidade e para a promoción turística como destino sostible, así como para a hostalería local”. Pola súa banda, Cheché Real puxo en valor “o compromiso da área de Turismo co sector da hostalería na realización deste concurso”.

Ao longo das dúas semanas do concurso, os locais participantes ofrecerán as súas tapas a todas as persoas que desexen degustalas, exercendo de xurado popular para escoller a tapa gañadora e as finalistas, que serán posteriormente avaliadas por un xurado profesional.

As persoas interesadas poderán votar as distintas tapas mediante un cupón de votación individual, que deberá ir selado polos establecementos participantes. Cada tapa poderá ser puntuadas cunha nota de 1 a 5. Ademais, todos os cupóns presentados participarán no sorteo de diversos premios, e en función do número de establecementos puntuados, os veciños e veciñas poderán gañar diferentes agasallos.

Nesta edición, o Concurso de Tapas contará coa participación de máis de 40 restaurantes e bares da cidade, entre os que se atopan 3 Pés, A Laxa, Anda, Antas, Ave César, Bulló Xantar, Casa d’Auga Vinoteca, Casa María, Castor, Coco’s Bar, Colmado 176y9 – Pazo de Orbán, De Vega, Desnivel, Eduri, El Boni, El Dotmas Bar, Fonte do Rei 2, Glam Taoo, Gran Café – Eurostars Gran Hotel Lugo, La Cosechera de 1977, La Escalera, La Pepita Lugo, La Terraza del Méndez, Las Cinco Vigas, Malizzia Street Food, Mercure Lugo Centro – Brasas Brancas, Mesón El Castillo, Cincuenta e Seis, Figón, Galo, Mercado, Orixe do Campo, Paprica, Pasarela, Prebe, Pub Karrusel, Pulpería O Castelo, San Marcos, Taberna Pimentel, The Real Coffee, Toni Portela e Tosar by Boni.