Presentado en Lugo o equipo de tecnificación de alpinismo
Na mañá de onte presentouse, no Rocódromo de Lugo, ao Equipo Galego de Novos Alpinistas (ENAG) da Federación Galega, formado por tres homes e unha muller.
O ENAG ten como obxectivos mellorar as técnicas individuais e de equipo de progresión de escalada en rocha, neve e xeo, sempre en ambiente alpino; aprender a adaptar as estratexias e as tácticas de escalada as condicións da montaña; traballar aspectos psicolóxicos da renuncia as ascensións; participar nas concentracións estatais convocadas pola federación española en diferentes macizos montañosos en España ou outros países europeos así como motivar a novos galegos e galegas á práctica do montañismo coa difusión entre os clubs galegos de actividades.
Hai que destacar que o montañismo galego conta cun total de 6.218 licencias federativas sendo o 60% correspondentes a homes (3.803) e o 40% (2.415) a mulleres. Un reparto que é aínda máis equitativo no caso das licencias 6-16 anos, a través do Xogade, que se contabilizan por 681, sendo o 55% nenos (374) e o 45% nenas (307).
O rocódromo de Lugo coma unha instalación de referencia
O acto tivo lugar no Rocódromo de Lugo, ubicado no Pazo de Feiras e Congresos, inaugurado en outubro de 2019 e que contou cun investimento de máis de 387.000 euros. A instalación conta con 15 metros de altura, zona de velocidade homologada, máis de 3.000 presas de escalada e zonas de dificultade extrema. Dispón tamén do primeiro muro de velocidade de 15 metros de altura indoor de toda España. Ademáis, cumpre cos requisitos do COI para a celebración de probas internacionais en formato olímpico.
Un rocódromo que xa é un dos mellores do país e que permite incrementar a oferta dos equipamentos deportivos da cidade, beneficiando tanto a actividade federada como o deporte base, e contribuíndo tamén á promoción de prácticas saudables entre a sociedade.
Ao fío desta idea hai que lembrar que o rocódromo de Lugo acollerá dúas probas de importancia como son o Campionato de España Infantil e Cadete de Escalada Deportiva (entre o 23 e o 25 de xullo) e a terceira e definitiva proba da Copa de España Absoluta de Escalada en Bloque (27 de novembro).
