Preto de 600 nenos acudiron aos obradoiros infantís no Mercado no primeiro semestre do ano
Cristina López, concelleira de Participación e Servizos á Veciñanza, valorou os obradoiros infantís que se celebraron ao longo do ano nas instalacións do Mercado Municipal. Cristina López explicou que "durante os primeiros meses do ano esta foi unha das actividades con máis aceptación por parte da veciñanza, acollendo en total a 591 nenas e nenos".
O Goberno de Lugo continuará coa celebración destes obradoiros "co obxectivo de promocionar unhas instalacións históricas e referentes do comercio de proximidade como son a Praza de Abastos e o Mercado Municipal, ao mesmo tempo que facilitamos a conciliación familiar".
As actividades están destinadas a nenas e nenos entre 4 e 12 anos, e tratan temas como a reciclaxe, a creatividade ou a cociña, tratando temas como o coidado do medio ambiente ou a creatividade.
"Continuamos a traballar para dinamizar a Praza e o Mercado con este tipo de actividades, que permiten que as nenas e nenos pasen unha mañá realizando actividades lúdicas e formativas", afirmou Cristina López, que engadiu "convidamos á veciñanza de Lugo a realizar as súas compras na Praza e no Mercado, desfrutando da atención personalizada das e dos distintos comerciantes da instalación e da calidade dos productos dos distintos postos, referentes do comercio de proximidade".