Profesionais de Urxencias do HULA convocan unha concentración polas carencias de persoal e medios
Os celadores do Servizo de Urxencias do Hospital Universitario Lucus Augusti iniciarán mobilizacións en protesta polas carencias humanas e materiais que, segundo denuncian, dificultan unha atención axeitada ás persoas usuarias. A primeira concentración está convocada para o mércores 18 ás 16:00 horas diante do propio servizo.
Os profesionais sinalan que a falta de persoal, a insuficiencia de medios e a elevada presión asistencial complican o traballo diario e repercuten directamente na calidade da asistencia. Aseguran que esta situación vén de tempo atrás e que, malia telo trasladado á Dirección do hospital, non se adoptaron solucións efectivas para corrixir o problema.
Enfermeiras, TCAEs e celadores coinciden na necesidade de reforzar os cadros de persoal para facer fronte á sobrecarga que soporta o servizo, así como de habilitar unha unidade intermedia destinada a pacientes pendentes de ingreso, co obxectivo de aliviar a saturación en Urxencias. Nun primeiro momento, os traballadores barallaron a posibilidade de realizar pequenos paróns diarios para visibilizar a situación, aínda que decidiron deixalos en suspenso ata manter as reunións previstas coa Dirección a comezos da vindeira semana.
Os convocantes insisten en que o seu obxectivo é garantir unha atención segura e digna para os pacientes e mellorar as condicións laborais dun colectivo que asegura estar sometido a unha presión constante pola falta de recursos.
CONTESTACIÓN DA CONSELLERÍA DE SANIDADE DA XUNTA
A Área Sanitaria de Lugo, A Mariña e Monforte de Lemos defende que non existe unha carencia de material nos seus dispositivos asistenciais e asegura que a distribución de recursos sanitarios se realiza de maneira periódica e nas cantidades necesarias.
Segundo explican desde a Dirección de Recursos Económicos e o Servizo de Subministracións, os envíos están dimensionados en función do consumo de cada unidade, tendo en conta factores como o tamaño do servizo ou centro de saúde, a actividade desenvolvida, a poboación adscrita e as necesidades específicas que poidan xurdir en cada momento.
O obxectivo, sinalan, é garantir que todos os servizos e unidades conten cos recursos precisos para desenvolver a súa actividade con absoluta normalidade e seguridade. Desde a xerencia subliñan ademais que non é certo que se manipulen ou alteren pedidos, xa que o sistema informático corporativo permite verificar en todo momento as cantidades solicitadas polos centros e as autorizadas polos órganos competentes, de acordo cos pactos de consumo establecidos con cada unidade. Todo o proceso queda rexistrado a través da aplicación LOGAS, que asegura a transparencia e a trazabilidade completa das solicitudes de subministración.
Os envíos, tanto á atención primaria como ás unidades hospitalarias, efectúanse en función dos consumos de cada servizo, que son revisados de maneira periódica e adaptados ao uso habitual dos produtos. Na maioría dos casos, este procedemento está informatizado e automatizado mediante o sistema coñecido como “dobre caixón”, un modelo loxístico que permite a reposición automática do material co fin de manter o stock previsto de cada artigo e garantir a continuidade asistencial.
A Área Sanitaria recoñece que este sistema de planificación e distribución non impide que, de forma puntual, poidan producirse roturas de stock dalgún produto concreto. Trátase, segundo indican, de situacións excepcionais para as que existen mecanismos específicos que permiten restablecer e repoñer o material con rapidez. Nestes casos, actívase a subministración urxente desde outros dispositivos asistenciais ou almacéns dispoñibles, evitando que estas incidencias teñan impacto na atención aos pacientes.
Finalmente, a xerencia lembra que a planificación dos subministros debe realizarse baixo criterios de eficacia, eficiencia e responsabilidade na xestión dos recursos públicos, compatibilizando a garantía do material necesario para a atención sanitaria e a seguridade de profesionais e usuarios cun uso axeitado do orzamento.