Promoven novas axudas para potenciar o taxi adaptado e a mobilidade accesible en Lugo
O Goberno local de Lugo impulsa novas liñas de axuda co obxectivo de fomentar a mobilidade accesible e reforzar o servizo de taxi adaptado no municipio. A área de Cohesión Social elevará á Xunta de Goberno Local a aprobación das bases reguladoras, a autorización do gasto e a apertura das convocatorias públicas 2025, cun investimento total de 19.000 euros.
As medidas, desenvolvidas no marco do convenio municipal co Instituto de Maiores e Servizos Sociais (IMSERSO) e coa Fundación ONCE, combinan apoio directo ás persoas usuarias e subvencións para o mantemento e mellora dos vehículos accesibles, coa finalidade de mellorar a autonomía das persoas con discapacidade e apoiar aos profesionais que prestan este servizo esencial.
A primeira convocatoria, dotada con 5.000 euros, está dirixida a persoas empadroadas en Lugo cunha antigüidade mínima dun ano, cunha discapacidade recoñecida igual ou superior ao 33 % e mobilidade reducida segundo o ditame técnico correspondente. Os beneficiarios poderán recibir ata 800 euros anuais, ou 1.000 euros no caso de residentes nas parroquias rurais, cun límite de renda de 2,25 veces o IPREM anual.
Os desprazamentos subvencionables realizaranse dentro do termo municipal, admitíndose viaxes excepcionais por motivos médicos, xudiciais ou educativos. O prazo de solicitude será de 15 días hábiles desde a publicación no Boletín Oficial da Provincia.
A segunda liña de axudas, cun orzamento de 14.000 euros, está destinada aos titulares de licenzas de taxi adaptado que operen en Lugo. As subvencións cubrirán gastos de mantemento, reparación, adaptación, mellora, seguros e outros custos asociados á posta en servizo dos vehículos accesibles. Cada beneficiario poderá recibir ata 3.000 euros, prevéndose o pago anticipado do 50 % sen necesidade de aval, e o resto condicionado á xustificación das actuacións. As bases exixen manter o servizo activo en condicións óptimas, incluíndo quendas nocturnas, fins de semana e festivos, garantindo así a dispoñibilidade continua.