Raiolas Lugo celebra o Día Mundial de Concienciación sobre o Autismo
O próximo 2 de abril celébrase o Día Mundial de Concienciación sobre o Autismo, unha xornada dedicada a sensibilizar e visibilizar sobre a diversidade e as necesidades das persoas con trastorno do espectro autista.
Este ano, o lema da campaña é Somos Infinitos, subliñando que non hai dúas persoas con autismo iguais. Cada individuo é único, cunhas necesidades, capacidades e intereses propios, o que esixe apoios especializados e adaptados á súa situación persoal e momento vital.
A Asociación Raiolas Lugo, comprometida coas causas das persoas con autismo, súmase un ano máis a esta campaña internacional, animando a toda a cidadanía a participar nas actividades programadas en colaboración co Concello de Lugo.
Entre as actividades destacadas, o día 2 de abril contará cunha serie de eventos para todos os públicos, comezando pola iluminación de cor azul da fachada principal do Concello de Lugo, pasarela peonil Tanxugeiras e fachada da oficina da sede da Deputación de Lugo a partir das 00.00 horas.
Ademais, ás 12.00 horas do 2 de abril terá lugar a lectura do Manifesto e de 17.00 a 19.00 horas haberá unha exhibición de baile a cargo da Escola de Danza Star Dance e obradoiros de elaboración de chapas.
Todas as actividades realizaranse dentro do Concello de Lugo onde terán un punto de información para aqueles que desexen coñecer máis sobre o autismo e os diferentes recursos dispoñibles.