Reábrese hoxe ao tráfico a estrada cortada en Becerreá por obras

A execución das obras de reforzo de firme na estrada autonómica LU-636 obrigou ao corte do tráfico durante a xornada de onte e ata as 15:00 horas de hoxe, ao seu paso polo municipio de Becerreá.

Estes traballos de mellora da seguridade viaria na LU-636 céntranse no tramo comprendido entre os puntos quilométricos 27+490 e 31+140 e estenderanse ata o vindeiro 31 de agosto.

Durante a execución das obras foi necesario o corte total da circulación polo que, para evitar o impacto dos traballos no tráfico nas fins de semana, as tarefas de rehabilitación do firme retomaranse o luns 23 agosto ás 8:00 horas e continuarán ata o venres 27 ás 15.00 horas. Pasada a fin de semana, as obras proseguirán o luns 30, prevéndose o seu remate o martes día 31 ás 20.00 horas.

A actuación forma parte das obras de acondicionamento do firme ao longo de nove quilómetros desta vía autonómica, entre o punto quilométrico 22 e ata o 31+140, situado á entrada do núcleo deste municipio lucense,

Estas tarefas na LU-636 inclúe a reparación das partes deterioradas e a reposición do firme en toda a calzada con tratamento asfáltico e rego de selado. Nos últimos 4 quilómetros, ata acceder á localidade becerrense, aplícase mestura bituminosa en quente en todo o ancho do carril.

Así mesmo, nos treitos en curva instalaranse barreiras e cunetas de seguridade polas marxes interiores. Posteriormente, renovarase a sinalización horizontal en todas as zonas de actuación.