Realizan labores de prevención nos montes de Láncara, O Páramo e Lugo
O Plan de prevención de incendios forestais da Consellería do Medio Rural continúa acondicionando os montes provinciais. Neste caso, a Xunta investiu preto de 100.000 euros en traballos preventivos nos montes de Lugo, Láncara e O Páramo, pertencentes ao distrito forestal IX Lugo-Sarria.
Os traballos que se están realizando nos montes de Lugo consisten na roza de faixas auxiliares de pista, para facilitar a circulación dos medios do Servizo de prevención e defensa contra os incendios forestais e diminuír o risco de incendios forestais na zona. Así, estase a actuar en montes das parroquias de Pedreda, Vilachá de Mera, Santa María Alta, Outeiro, Camoira, Veral, Labio, Bóveda e San Xoán Alto.
Nos montes do concello de Láncara ademais de realizar traballos preventivos de mellora de pistas e roza de faixas auxiliares, tamén se está actuando no acondicionamento de cortalumes, que buscan interromper a continuidade da vexetación naqueles lugares especialmente axeitados de cara a deter un posible incendio forestal. Neste caso, estase traballando en montes das parroquias de Armeá, Touville, Lama, Souto e Monseiro.
Por último, no caso do concello do Páramo, estanse realizando obras preventivas en montes das parroquias de Moscán, Vilafiz e Sa. Neste caso, estanse levando a cabo melloras de infraestruturas e desbroces de faixas auxiliares de pista e de pistas forestais. Estas accións inclúen tamén a colocación de pasos de auga naqueles lugares onde son necesarios e o acondicionamento dos accesos aos montes.
Todas estas obras enmárcanse no Plan de prevención de incendios forestais da Consellería do Medio Rural, que no ano 2021 contou cun orzamento de case 30 millóns de euros para actuar en máis de 58.000 hectáreas de territorio e nuns 5.000 quilómetros de pistas e vías de comunicación. O obxectivo final destas accións preventivas é evitar que o lume se produza, e en caso de producirse, limitar ao máximo a súa propagación e minimizar os danos causados.