Reforman as urxencias pediátricas e a área de triaxe do HULA
![hula hospital lugo](https://lugoxa.com/wp-content/uploads/2021/02/hula-hospital-lugo.jpg)
As urxencias pediátricas no Hospital Lucus Augusti de Lugo están sendo reformadas para diferencialas do resto de urxencias médicas e tamén se ampliará a área de triaxe para implementar un segundo posto. A portavoz de sanidade apuntou que esta actuación nas urxencias pediátricas do HULA, que abarca unha superficie de case 500 metros cadrados, desenvolveuse en tres fases: unha xa está operativa, outra estarao nos vindeiros días e a última prevese o seu remate para finais do vindeiro mes de febreiro.
Por outra banda, o BNG demandou no Parlamento a habilitación dunha sala de agarda digna para as crianzas e familias que agardan nestes servizos de Urxencias Pediátricas do HULA. A deputada por Lugo, Olalla Rodil, declarou que, se ben o BNG non pon obxección ao traslado das Urxencias Pediátricas dentro do hospital, este traslado non pode conlevar situacións como “non atopar espazo nin suficiente nin debidamente acondicionado para agardar a súa quenda”, como ocorreu nos meses de novembro e decembro, coa suba de casos de enfermidades respiratorias en nenos e nenas.
Fronte esta situación, Rodil argumentou que pode haber consenso en todas as forzas políticas en que o feito de masificar e agardar nas Urxencias “non é cómodo en ningún caso pero se falamos de crianzas, bebés en moitos casos, debe e pode habilitarse un espazo co acondicionamento necesario para garantir, na medida das posibilidades, un espazo confortable para as nenas e nenos e quen as acompaña”. É por iso que o BNG emprazou ao Executivo do PP a ofrecer unha zona de agarda digna para familias e nenos e nenas, proposta que acadou a unanimidade na Cámara, coa promesa de cumprirse no prazo dun mes.