Remata a peregrinación de cinco días pola histórica Vía Künig

Este evento reafirma o gran potencial da Vía Künig, un camiño histórico que leva anos loitando por ser recoñecido oficialmente como parte do Camiño de Santiago

Conclúe a peregrinación de cinco días pola histórica Vía Künig, dende Pedrafita do Cebreiro ata Lugo, que contou cunha gran participación e seguimento.

O artista Diego AS, o historiador Javier Gómez Vila e o guía turístico Guido Álvarez lideraron esta iniciativa, que sumou máis de 100 acompañantes en distintos momentos e alcanzou a decenas de miles de seguidores a través das redes sociais.

Durante a ruta, recibiron o apoio de colexios, panadarías, aloxamentos, bares, confiterías, restaurantes, institucións e, sobre todo, da veciñanza dos concellos polos que pasaron: Pedrafita do Cebreiro, As Nogais, Becerreá, Baralla, O Corgo e Lugo.

Entre os 13 peregrinos que completaron as cinco etapas había persoas procedentes de Arxentina, Madrid, Oleiros, Ribadeo, Foz, Quiroga, Guitiriz e Lugo. Ademais, moitos outros participantes uníronse en diferentes tramos, incluíndo xente da provincia de Lugo e doutros puntos de Galicia como A Estrada, A Coruña, Fene, Ferrol ou Santiago de Compostela.

Este evento reafirma o gran potencial da Vía Künig, un camiño histórico que leva anos loitando por ser recoñecido oficialmente como parte do Camiño de Santiago.