Rematada a obra de mellora da estrada LU-P-2704 ao seu paso por Gradín, en Láncara
A Deputación de Lugo vén de concluír unha intervención na estrada provincial LU-P-2704, no lugar de Gradín, pertencente ao concello de Láncara, cun orzamento que ascendeu a 45.375 euros.
A actuación centrouse na construción dun novo muro de contención e na substitución da infraestrutura de drenaxe transversal, co obxectivo de consolidar a estabilidade da calzada e reforzar a seguridade na circulación nun treito que presentaba graves problemas estruturais.
O deputado de Promoción Económica e Social e alcalde en funcións de Láncara, Pablo Rivera Capón, desprazouse ata a zona para revisar o resultado das obras acompañado polo concelleiro de Medio Rural, Servizos Públicos Básicos e Mobilidade, José Manuel García Aldegunde.
Rivera Capón subliñou que esta intervención “responde a unha demanda real da veciñanza, xa que se trata dunha vía moi utilizada que conecta distintos núcleos rurais do municipio e que presentaba perigo para a circulación. A actuación permite recuperar a seguridade e garantir unhas comunicacións viarias axeitadas no rural”.
Os traballos executáronse entre os puntos quilométricos 4,650 e 4,690 da LU-P-2704, que conecta a Veiga de Anzuelos, na parroquia de Vilarello, coas de Trasliste e Bande. O tramo atopábase moi deteriorado debido ao colapso dun tubo de drenaxe de 40 centímetros de diámetro, o que causaba filtracións de auga que comprometían a base da estrada.
Ante a magnitude dos danos, descartouse unha simple reparación e optouse por substituír completamente o sistema de drenaxe. Foi preciso cortar o firme, retirar a antiga canalización e construír unha nova base de formigón sobre a que se instalou unha nova tubaxe. A continuación realizouse o recheo e compactación para recuperar a cota da vía.
Unha das partes máis salientables da obra foi a execución dun muro de escollera tanto na zona onde se produciu a rotura da calzada como noutro punto afectado pola erosión do terraplén, garantindo así a estabilidade da plataforma viaria e evitando desprendementos.
A intervención completouse coa reposición do firme mediante a reconstrución da capa de rodadura para homoxeneizar o pavimento e coa colocación de barreiras de seguridade nos puntos máis vulnerables.
Esta actuación representa unha importante mellora para a seguridade viaria das parroquias de Vilarello, Trasliste e Bande, cuxos habitantes usan esta vía para os seus desprazamentos habituais a vivendas, explotacións e servizos básicos.
Os traballos foron financiados integramente pola Deputación de Lugo e enmárcanse na súa estratexia de conservación e mellora da rede viaria provincial, que supera os 4.200 quilómetros e resulta clave para o desenvolvemento e cohesión do territorio.