Representantes do Camiño Francés convidan ao papa León XIV a facer un tramo da ruta no Ano Santo 2027
Unha delegación formada por alcaldes e representantes locais dos once concellos galegos que integran a Mancomunidade de Municipios do Camiño Francés, entre eles o alcalde de Palas de Rei, Pablo Taboada, e a alcaldesa de Triacastela, Olga Iglesias, viaxou ao Vaticano para convidar oficialmente ao papa León XIV a peregrinar polo Camiño de Santiago con motivo do próximo Ano Santo 2027.
Durante a audiencia xeral celebrada na Praza de San Pedro, os representantes galegos fixeron entrega ao Pontífice dunha carta formal de invitación, acompañada dunha vieira de Sargadelos e dun bordón xacobeo, dous dos símbolos máis recoñecidos do peregrino e emblemas da hospitalidade galega.
O xesto enmárcase no programa “Almas del Camino”, unha iniciativa que busca difundir os valores universais do itinerario xacobeo e fortalecer os vínculos entre Galicia e o Vaticano. A carta invita ao Papa a percorrer algún dos tramos do Camiño Francés, unha das rutas máis emblemáticas e transitadas do Xacobeo.
Os representantes dos concellos subliñaron que unha eventual visita papal suporía “un gran impulso” para o Ano Santo 2027, no que se prevé unha importante afluencia de peregrinos e visitantes, consolidando así o papel do Camiño como espazo de encontro espiritual, cultural e de fraternidade entre pobos.