Representantes do proxecto europeo POST foron recibidos no Concello de Lugo
Representantes do proxecto europeo POST (Policentric and Sustainable Tourism) foron recibidos na Casa Consistorial do Concello de Lugo como parte da visita a Lugo na axenda de traballo de tres días pola provincia, que inclúe reunións técnicas, encontros con actores locais e percorridos por distintos enclaves emblemáticos do territorio.
Esta iniciativa, liderada polo Eixo Atlántico e financiada polo programa INTERREG VI B - Espazo Atlántico, que ten como obxectivo desenvolver un modelo innovador de turismo máis equilibrado, sostible e respectuoso co territorio, está organizada en colaboración co Concello de Lugo, a Deputación Provincial e o Concello de Monforte de Lemos e no proxecto participan entidades de España, Portugal, Irlanda e Francia
Durante o encontro, o alcalde puxo en valor o papel de Lugo como referente dun turismo que aposta pola calidade fronte á cantidade, pola autenticidade, e polo respecto á identidade e ao patrimonio local. "Lugo é un exemplo de como se pode combinar o desenvolvemento turístico coa preservación do medio e do benestar da veciñanza", sinalou Miguel Fernández.
Ademais, o rexedor desexou ás delegacións participantes unha estadía frutífera na cidade e na provincia, convidándoos a descubrir a riqueza patrimonial e natural do territorio lucense, desde a Muralla romana ata enclaves como o Castro de Viladonga, Samos ou a Ribeira Sacra.
O proxecto POST articúlase ao redor de conceptos como o turismo de autor e o turismo policéntrico, cun enfoque que busca redistribuír os fluxos turísticos cara ao interior e ás zonas menos masificadas, contribuíndo así á cohesión territorial e á loita contra o despoboamento.
Os resultados finais do proxecto POST presentaranse nos vindeiros meses e trasladaranse á Comisión Europea para contribuír ao deseño da futura política de turismo europea, así como ás cidades e entidades do Eixo Atlántico co obxectivo de analizar as potencialidades turísticas específicas de cada zona e valorar como poden implantarse estes novos conceptos de forma adaptada a diferentes realidades, para, posteriormente, trasladalo ao conxunto da Unión Europea.
A definición e identificación da posta en marcha deste modelo de turismo está a ser viabilizada pola Comisión Europea a través do programa Espazo Atlántico.