Rexístrase un terremoto de magnitude 3.7 na provincia de Lugo con epicentro en Sarria

Un movemento sísmico cunha magnitude de 3.7 acaba de ser rexistrado na provincia de Lugo sobre as 16.39 horas deste venres, segundo os datos recollidos polo Instituto Xeográfico Nacional (IGN).  O epicentro do terremoto situouse na parroquia de Betote, a preto de dous quilómetros de Sarria.

O sismo tivo unha intensidade baixa, polo que non deberían de producirse danos materiais nin persoais. Notouse especialmente en Sarria e na capital provincial, aínda que tamén puido apreciarse noutras localidades como Láncara, Castroverde, Rábade, Begonte, Baralla, Becerreá, Cospeito, Portomarín, Pol ou Outeiro de Rei. De feito, nalgúns concellos os veciños saíron á rúa asustados polo breve movemento de terra, que durou uns segundos, e polo ruído que lles semellou de maior intensidade que a que se rexistrou segundo a escala Richter.

Pola súa parte, noutros municipios como Escairón ou Monterroso sentiron o ruído pero non tanto o movemento, que tamén notaron na zona da costa e en localidades como Chantada, Taboada ou Monforte. Segundo o IGN o tremor tivo unha profundidade de 0 quilómetros, polo que foi na superficie. Moitas persoas alarmadas polo sismo quixeron compartir a situación a través das redes sociais. "Foi como unha explosión seguida dun breve tremor", "pensei que fora de máis intensidade, que se movía todo e máis o ruído" ou "moveuse todo" foron algúns dos comentarios dos lucenses.