Rueda participa nun xantar do PP en Baleira
O presidente do PPdeG, Alfonso Rueda, asistiu en Baleira ao xantar organizado polo PP da provincia de Lugo, no que o alcalde da localidade e candidato á reelección, Ángel Martínez-Puga, exerceu como anfitrión. Xunto a el, estiveron a vicesecretaria de Acción Sectorial do PPdeG e candidata á alcaldía de Triacastela, Olga Iglesias; así como os candidatos á alcaldía da Fonsagrada, Bernardo Niño; Navia de Suarna, Raúl Pérez; Baralla, Miguel González; e O Incio, Héctor Corujo. Asistiu tamén o coordinador xeral do PP de Lugo, José Manuel Balseiro.
O líder dos populares galegos tivo a oportunidade de compartir impresións cos candidatos e os seus equipos, aos que definiu como xente comprometida cos seus territorios, e coñecer de primeira man os seus obxectivos na campaña electoral. Entre eles, a necesidade de impulsar social e economicamente a comarca e fixar poboación nos municipios que a conforman.
Así mesmo, Alfonso Rueda tendeu a súa man para axudalos a facer do medio ambiente unha oportunidade económica mediante o aproveitamento dos recursos turístico-ambientais que ofrece a Reserva de Biosfera Río Eo, Oscos e Terras de Burón. De feito, cabe salientar que o Goberno galego investiu nos últimos anos máis de 150.000 euros en axudas directas a estes concellos para mellorar e conservar as condicións deste espazo.