Salvatore Miceli ofrecerá un concerto en O Vello Cárcere este domingo

O saxofonista italiano actuará o 10 de agosto ás 19:30 acompañado por seis músicos e cun repertorio que inclúe obras de Bach, Mozart e Poulenc

A concelleira de Cultura, Turismo e Promoción da Lingua, Maite Ferreiro, anunciou que o saxofonista italiano Salvatore Alessandro Miceli ofrecerá un concerto este domingo, 10 de agosto, a partir das 19:30 horas, no Vello Cárcere.

Ferreiro destacou que esta iniciativa forma parte da aposta municipal por ampliar a oferta cultural e de lecer en Lugo con actividades abertas a toda a cidadanía e de carácter gratuíto.

Miceli, que contará co acompañamento de Xurxo Morales, Adrián Sáiz, Inés Pérez, Diego Mateo, Darío González e Anxo González, interpretará un programa que recolle pezas de compositores como Bach, Mozart, Bounneau, Poulenc, David, Villalobos, Telemann e Shulteis.

Formado musicalmente no Istituto Superiore di Studi Musicali V. Bellini de Caltanissetta, en Sicilia, onde recibiu clases de Frederico Alba, Miceli completou a súa formación con cursos maxistrais impartidos por J.M. Londeix e C. Delangle.

Na actualidade continúa os seus estudos con Marie-Bernadette Charrier no Pôle d'enseignement supérieur de la musique et de la danse de Burdeos. O músico italiano acumula numerosos premios en concursos do seu país e actúa con regularidade tanto como solista como integrado en agrupacións musicais.