San Marcos conta cunha escultura en tributo ás persoas e colectivos que traballaron na primeira liña durante a pandemia
![Escultura San Marcos](https://lugoxa.com/wp-content/uploads/2023/04/Escultura-San-Marcos.jpg)
A Deputación de Lugo abriu ao público unha escultura que encargou para render homenaxe ás persoas e colectivos que traballaron na primeira liña durante a pandemia da Covid-19. O presidente da institución provincial, José Tomé Roca, xunto ao autor, Miguel Couto, descubriu esta peza de bronce que se atopa instalada nos xardíns do Pazo de San Marcos.
A escultura leva o nome Os que nos coidan porque está pensada para que a veciñanza da provincia lembre ao persoal sociosanitario, Forzas e Corpos de Seguridade, institucións, entidades e todas as persoas que contribuíron a protexer e coidar da poboación durante a pandemia. A peza, que é transitable no seu interior, representa un abrazo de dúas persoas.
O autor, Miguel Couto, é un artista coruñés de recoñecido prestixio e experiencia, que conta con máis dunha vintena de obras en diferentes espazos públicos de Abegondo, Porto do Son, A Coruña, Viveiro, Ares ou O Cebreiro.