Sanidade fará un cribado entre 3.500 estudantes do Campus de Lugo

O Sergas fará tests de antíxenos ao alumnado entre o luns 1 e o martes 2 de marzo, coincidindo co reinicio das clases presenciais.

O Sergas vén de anunciar que realizará un cribado masivo entre 3.500 estudantes do Campus de Lugo. Será entre o luns e o martes da vindeira semana. Deste xeito, e coincidindo co reinicio das clases presenciais desde o 1 de marzo, realizaranse tests de antíxenos a máis do 40% do alumnado.

Hoxe mesmo ultimáronse os detalles do proceso nas instalacións nas que se tomarán as mostras, na Facultade de Veterinaria. Para o luns e o martes vindeiros está previsto o despregamento de sete equipos para a toma das mostras, en quendas de mañá e tarde.

Os alumnos e alumnas serán citados por SMS. Os resultados coñeceranse nun tempo aproximado de quince minutos, o que permitirá actuar con rapidez no caso de que se detecte algún positivo.