Segue a urbanización da ampliación do Parque Industrial das Gándaras
Avanzan na urbanización da ampliación do Parque Industrial das Gándaras na que se investiron 2,6 millóns de euros. A superficie resultante, de 97.654 m², fragmentarase en varios predios e suporá tamén a creación de diferentes zonas verdes, prazas e viarios.
A actuación implicou a segregación en dous predios, da denominada Unidade Funcional S - situada na rúa Juan Jacobo Durán Loriga (vial D) e Rafael Cadórniga Carro (Vial C) - cunha superficie total de 1.259.862 m², que dará como resultado unha parcela matriz de 1.162.208 m² e outra denominada Unidade Funcional S, de 97.654 m². Esta última dividirase, á súa vez, noutras parcelas de diferentes tamaños, e tamén en espazo dedicado a zonas verdes, prazas e viarios
O Goberno autonómico explicou que se cederán ao Concello de Lugo os viais, unha praza pública de máis de 6.000 metros cadrados e unha zona de aparcadoiro de 20.000 metros cadrados para dispoñer máis de 380 prazas de aparcadoiro, que ascenden a 530 si se teñen en conta as prazas dispoñibles nos viarios. A Xunta prevé recibir as obras de ampliación neste mes, co que estaría en disposición de ceder estas novas dotacións ao Concello antes de fin de ano.
Dende o ente autonómico destacaron que estes traballos sumaron 97.691 m2 de solo industrial nas Gándaras, dos que 45.290 corresponden a 12 parcelas, das que 9 teñen unha superficie de 1.000 m2 cada unha e as outras tres dispoñen de 25.000, 8.990 e 2.300 m2, respectivamente. A expansión posibilita a implantación de novas empresas, como Bricomart, que xa está a construír as súas instalacións nunha destas novas parcelas.
“O polígono das Gándaras segue medrando", afirmaron, "dado que están en proceso de adxudicación as obras da terceira fase de explanación, urbanización e electrificación, licitadas en outubro cun orzamento de 1,65 millóns de euros”.
Esta terceira fase ocupará unha superficie total de 55.768 m2, dos que 35.434 serán de uso industrial e comercial, repartidos en 27 parcelas con superficies que oscilarán entre 945 e 5.200 m2. A meirande parte das parcelas resultantes terán entre 945 e 1.200 m2, que son as máis demandadas nas Gándaras, e so dúas superarán esa superficie: unha de 2.700 e outra de 5.200 m2.