Eventos

O humorista propón unha viaxe chea de retranca á infancia e á memoria televisiva dunha xeración

O humorista Sergio Alba presentará en Guntín o seu novo espectáculo “Dous rombos... Pasa para a cama”, na Casa da Cultura o sábado 14 de marzo a partir das 20.00 horas, nunha velada que promete humor, lembranzas e moita complicidade co público asistente.

A través dunha montaxe cargada de ironía e complicidade co público, o artista invita a botar a vista atrás para revisitar esas etapas temperás que tantas lembranzas deixaron gravadas na memoria colectiva.

Co paso dos anos resulta case inevitable mirar ao pasado e atopar refuxio na felicidade vivida durante a infancia e a adolescencia. Porén, xunto ás escenas entrañables tamén aparecen situacións e costumes que, vistas desde hoxe, poden provocar certo rubor. Lonxe de agochalas, o espectáculo opta por poñelas enriba do escenario e abordalas desde a óptica do humor, convertendo a nostalxia nun exercicio de risa compartida.

Entre gargalladas, o público poderá lembrar aquel tempo no que, ao aparecer dous rombos na pantalla do televisor, tocaba abandonar o salón e marchar para a cama. Unha etapa marcada pola transición do branco e negro á televisión en cor, un cambio que se produciu case sen decatarnos e que simbolizou tamén unha nova maneira de entender e vivir a realidade.

Esta proposta “retro-activa” pretende ser, ademais, unha oportunidade para desconectar da rutina dixital que domina o día a día e aceptar o desafío de rirnos do noso lado máis analóxico, ese que medrou entre antenas, mandos con cable e programación familiar.