Shihan Jiujitsu acolle un Open Mat feminino para impulsar a presenza das mulleres neste deporte
A Escola Deportiva Shihan será o escenario, o vindeiro domingo 21 de decembro, dun Open Mat feminino organizado polo club Shihan Jiujitsu, unha iniciativa que busca seguir fortalecendo a presenza das mulleres nunha disciplina na que aínda son minoría. O club, que comezou a súa andaina con apenas cinco mulleres, conta na actualidade con máis de vinte practicantes de diferentes idades, todas elas interesadas en aprender e medrar dentro deste arte marcial.
Co obxectivo de continuar esa evolución, o evento reunirá mulleres procedentes de distintos puntos de Galicia e tamén doutras comunidades autónomas, apoiándose no impulso do colectivo Mulleres en Loita, un grupo clave na promoción do jiujitsu feminino promovido por María Raja.
A través das súas xuntanzas mensuais, Mulleres en Loita traballa para dar visibilidade ao jiujitsu practicado por mulleres, animar a aquelas que senten inseguridade á hora de comezar, apoiar a quen debe compatibilizar o deporte coa vida familiar e fomentar tamén o espírito competitivo cando así o desexan.
Máis alá do aspecto técnico, o colectivo aposta por crear unha rede de unión e compañeirismo arredor deste deporte, na que o intercambio de experiencias, retos e aprendizaxes compartidas sexa o eixo central. Desde Shihan Jiujitsu consideran que acoller esta quedada é unha oportunidade inmellorable para dar a coñecer un arte marcial no que a técnica prevalece sobre a forza, converténdoo nunha ferramenta especialmente útil tamén para a defensa persoal.
O profesorado do club subliña ademais o valor que ten para as integrantes do equipo poder convivir e adestrar con outras mulleres, compartir vivencias e descubrir novas oportunidades nun ambiente que definen como inmellorable pola unión entre Shihan Jiujitsu e Mulleres en Loita. A xornada está concibida como un día para gozar, loitar, rir e compartir, coa aprendizaxe e o bo ambiente como grandes protagonistas.