Supervisado en Pedrafita do Cebreiro o dispositivo que garantirá a circulación nas estradas
A subdelegada do Goberno en Lugo, Isabel Rodríguez, supervisou hoxe en Pedrafita do Cebreiro o dispositivo organizado na provincia dentro do Plan de Vialidade Invernal. No acto, celebrado no Centro de control de túneles da A-6, participaron responsables de Protección Civil, a Xefatura provincial de Tráfico, o Subsector de Tráfico da Garda Civil e a Unidade de Estradas do Estado na provincia. Tamén estivo presente o alcalde de Pedrafita do Cebreiro, José Luis Raposo.
Isabel Rodríguez destacou o importante operativo que se pon en marcha na provincia para garantir a circulación nas estradas do Estado durante o inverno, en condicións meteorolóxicas adversas. Tamén resaltou a colaboración dos diferentes servizos e unidades da Administración do Estado e a implicación de todo o persoal que traballa para dar seguridade aos usuarios e facilitar a maior comodidade posible e a fluidez do tráfico na rede de estradas e autovías.
A subdelegada indicou que o Plan de Vialidade Invernal, que se desenvolverá ata o mes de abril, xa se puxo a proba durante a fin de semana coas primeiras nevaradas que afectaron aos concellos da comarca da Montaña, onde se activou intermitentemente o nivel verde de precaución os días 27 e 28 en dúas vías da rede de estradas do Estado, a N-VI e a autovía A-6, no límite das provincias de Lugo e León.
Rodríguez informou de que este inverno o Ministerio de Transportes, Mobilidade e Axenda Urbana ten despregados na provincia un total de 42 máquinas quitaneves para facilitar o tránsito de vehículos. Os medios materiais complétanse coas 9.300 toneladas de sal e 2.515.000 litros de salmoira almacenados nos silos. Estas cantidades forman o acopio inicial que será aumentado en función das necesidades que se produzan durante o inverno.
O dispositivo que se fai cargo da limpeza das estradas da provincia está composto por 124 operarios de mantemento de estradas distribuídos nos catro sectores de conservación nos que está dividida a provincia.
A subdelegada lembrou que o Plan provincial de Vialidade Invernal contempla a vixilancia e limpeza de un total de 993,09 quilómetros das 13 vías que integran a Rede de Estradas do Estado na provincia, así como a vertente leonesa do porto de Pedrafita. Para iso, tamén se efectuou esta mañá a sinatura do Protocolo coa provincia de León para a limpeza da vertente leonesa do porto de Pedrafita.