Tradime ofrecerá formación gratuita en Lugo para transportistas
A Asociación de Empresarios de Transporte de Mercadorías por Carretera de Lugo (Tradime) ten previsto impartir nas próximas datas tres cursos específicos dirixidos ao sector do transporte por carretera: dous de formación continua do CAP (Certificado de Aptitude Profesional) e un sobre tacógrafo dixital e normativa social.
O CAP é obrigatorio para todos os profesionais do transporte de mercadorías por carretera e debe renovarse cada cinco anos. Os cursos organizados por Tradime están dirixidos a condutores que aínda non actualizaron o seu certificado e que obteron o carné de conducir antes do 11 de setembro de 2009.
Ambos os cursos CAP, cunha duración de 35 horas, desenvolveranse de forma simultánea nas aulas do Centro de Formación da Confederación de Empresarios de Lugo (CEL), situado en Manuel Murguía, 6 – Baixo. As datas previstas son os días 24, 25, 30 e 31 de maio, e o 1 de xuño. O horario será de 15:00 a 22:30 horas os venres, e de 8:00 a 15:30 horas os sábados e domingos.
Pola súa banda, o curso sobre tacógrafo dixital e normativa social terá lugar nunha única sesión de catro horas o día 7 de xuño de 2025, de 9:00 a 13:30 horas, tamén no Centro de Formación da CEL.
Todas estas accións formativas son completamente gratuítas e están financiadas polo Goberno de España a través do Ministerio de Transportes e Mobilidade Sostible, no marco do plan de axudas vixente.
Tradime ofrece un total de 32 prazas para os cursos CAP e 16 para o de tacógrafo dixital, que se cubrirán por rigurosa orde de inscrición.