Transición Ecolóxica realiza unha limpeza e roza na avenida Adolfo Suárez de Lugo

Miguel Fernández destacou a importancia desta intervención, asegurando que “o acceso á cidade pola Fervedoira segue a ser unha das vías máis empregadas"

A área de Transición Ecolóxica do Concello de Lugo realizou unha limpeza e roza exhaustiva na avenida Adolfo Suárez, un dos accesos máis importantes á cidade pola Fervedoira.

O alcalde Miguel Fernández, acompañado pola edil de Cohesión Social e Territorial, Ana González Abelleira, visitou a zona para comprobar o progreso dos traballos, que se remataron despois de dous días intensos de labores.

Para levar a cabo estas tarefas, foi preciso empregar un amplo despregamento de persoal e maquinaria, con ata unha ducia de traballadores da empresa adxudicataria do Servizo Municipal LuceLugo, que se encargaron da limpeza e roza nas marxes da calzada. O traballo tamén contou coa colaboración de diversos servizos municipais.

Miguel Fernández destacou a importancia desta intervención, asegurando que “o acceso á cidade pola Fervedoira segue a ser unha das vías máis empregadas, polo que o seu acondicionamento e mantemento deben ser prioritarios”. Ademais, subliñou que a mellora deste acceso é fundamental para garantir a seguridade viaria, xa que, segundo o rexedor, a limpeza e roza melloran a visibilidade da calzada en ambos os dous marxes da avenida Adolfo Suárez.

Os traballos de roza implicaron o uso de diferentes tipos de maquinaria, como tractores con rozadoira, sopradores eléctricos, e tractores con brazos articulados e de arrastre, que permitiron realizar os traballos mecánicos de maneira eficiente. Ao rematar, tamén se utilizou unha varredora de calzadas para deixar a vía completamente limpa. Para garantir un traslado axeitado do persoal e as ferramentas, empregáronse vehículos auxiliares e furgonetas eléctricas.

Este operativo foi coordinado por dous capataces encargados de supervisar o bo desenvolvemento dos traballos, que se executaron de maneira áxil, permitindo así que a zona quedara acondicionada en tempo récord.

Miguel Fernández tamén destacou que a mellora da zona da Fervedoira está contemplada nos orzamentos deste ano, cun investimento de 100.000 euros, destinados á redacción dun proxecto transformador para mellorar o acceso á cidade. Este proxecto será parte das melloras previstas para os próximos anos na cidade.

Coa finalización desta actuación, o Concello de Lugo reafirma o seu compromiso co mantemento e mellora dos accesos á cidade, mellorando a seguridade e a calidade do espazo público para os veciños e veciñas.