Tres alumnos de Lugo, premiados polo seu traballo nas especialidades artísticas
Unha ducia de estudantes de ensinanzas artísticas veñen de acadar os premios da Xunta de Galicia que recoñecen o seu desempeño excelente. O Diario Oficial de Galicia vén de publicar a resolución dos premios fin de carreira para o alumnado que rematou os seus estudos de ensinanzas artísticas superiores e dos premios extraordinarios na modalidade de ensinanzas artísticas profesionais nos ámbitos de música, de danza, e de artes plásticas e deseño.
No caso dos galardóns de fin de carreira, recoñecen o labor do alumnado que rematou brillantemente os seus estudos conducentes a unha titulación superior de ensinanzas artísticas no curso 2022/23, nos centros dependentes da Xunta de Galicia.
Tal e como recolle a orde de convocatoria, as persoas premiadas reciben unha dotación económica de 3.500 euros e un diploma acreditativo desta distinción, certificando que se trata do estudante que conta co mellor expediente académico de entre aos solicitantes.
A listaxe de beneficiarios inclúe a Pablo Rodríguez Regueiro, estudante de Deseño de Interiores na Escola de Arte Ramón Falcón.
No que atinxe aos premios extraordinarios, distinguen o traballo de alumnado que finalizou as ensinanzas profesionais de Música, de Danza ou de ciclos formativos de grao superior de Artes Plásticas e Deseño, no curso 2022/23. Para acceder a estes galardóns, os candidatos debían ter unha nota media igual ou superior a 8,75 puntos.
De acordo co establecido na convocatoria, os estudantes premiados reciben un galardón de 1.000 euros e un diploma acreditativo.
En Lugo os premios foron para Ignacio Illán Sastre, estudante de danza contemporánea no Conservatorio de Lugo, e para María Isabel Vázquez Rodríguez, alumna de cerámica artística na Ramón Falcón.