Ulloa Viva alerta dos “estudos erróneos” de Altri ante a Xunta para a súa planta en Palas
![ulloa-via-reunión-Secretario-Xeral-de-Industria](https://lugoxa.com/wp-content/uploads/2024/07/ulloa-via-reunion-Secretario-Xeral-de-Industria.jpg)
A Plataforma Ulloa Viva mantivo en Santiago, na sede da Xunta de Galicia, un encontro co secretario xeral de Industria e Desenvolvemento Enerxético, Nicolás Vázquez Iglesias, ao encontro asistiron Zeltia Laya e Marcial Barral. Os membros de Ulloa Viva aproveitaron este primeiro encontro oficial que a Plataforma ten con un representante do goberno galego para alertar sobre “os informes incorrectos e o estudos erróneos” que a empresa Altri está a tramitar diante da Xunta para pedir as autorización para a súa macrocelulosa en Palas de Rei.
Diante desta “barbariedade contra a auga, o aire, a economía, a cultura e o benestar dos veciños e veciñas da zona afectada, pedímos de novo (esta vez en persoa por primeira vez) á Xunta de Galicia que paralice a tramitación do proxecto de Altri e Greenalia”. Os representantes de Ulloa Viva acudiron a este encontro logo de ter enviado a Plataforma numerosas peticións ao longo dos últimos meses a distintos estamentos da Xunta para “sermos recibidos, escoitados e tratados coma veciños e veciñas da zona afectados e preocupados” diante desta instalación dunha macrocelulosa no corazón de Galicia.
Segundo lembraron Laya e Barral ao secretario xeral de Industria “todos os informes dos técnicos e expertos avalan que suporá a destrución do noso medio ambiente, a nosa economía local sostible, o noso modo de vida e a nosa saúde e a dos nosos fillos e fillas”. A Plataforma Ulloa Viva acudiu a este encontro “co único obxectivo de que a Xunta de Galicia nos informe aos veciños e veciñas afectadas do que está a acontecer arredor deste proxecto de Altri”.
Segundo lle explicaron “comezamos coñecendo por titulares de prensa esta suposta biofábrica fai dous anos, levamos dous anos pedindo que o goberno galego nos informe, agora cos datos publicados no Diario Oficial de Galicia o que queremos e saber si a Xunta está co que a veciñanza expresou nas rúas e nas 23.000 alegacións, ou está do lado da empresa”. Cos datos oficiais do proxecto en tramitación, que falan de 46 millóns de litros de auga ao día de captación, 30 millóns de litros diarios de vertido, unha celulosa de 366 hectáreas, que vai a producir 400.000 toneladas de celulosa, contaminar o noso aire con emisión dende unha cheminea de 75 metros e que vai botar 60 toneladas de sulfatos á auga do Ulla, preguntaron ao secretario xeral de Industria “cal é o estado no que se atopan as tramitacións administrativas dun proxecto que a todas luces a nivel técnico non cumpre coa normativa vixente”.
Bolsa de emprego
Laya e Barral reiteraron ao secretario xeral de Industria que a Plataforma conta con informes feitos e avalados por expertos en tódalas materias ás que afecta o proxecto, que foron entregados en Bruxelas, no Congreso dos Deputados e no Parlamento galego a todos os partidos, “informes que alertan das eivas deste proxecto, dos danos que pode provocar no territorio e do feito de que incumpre alomenos 7 directivas da Unión Europea”.
Tamén aproveitaron o encontro para cuestionar os pasos que está a dar a empresa nos últimos meses, coma unha suposta bolsa de emprego que puxo en marcha Greenfiber para a macrocelulosa de Palas de Rei “que non ten, que saibamos, os permisos ambientais e legais que ten que concederlle en primeira instancia a Xunta de Galicia”. Laya e Barral afeáronlle á Xunta o feito de que as Oficinas de Emprego do Goberno galego teñan enviado esta oferta aos parados e paradas rexistradas, “unha bolsa de emprego dunha empresa privada, que non ten permisos e que como moito podería xerar emprego dentro de 4 anos no caso de que a súa tramitación siga adiante”.
Tamén pediron explicacións na Xunta os membros de Ulloa Viva polo feito de que no seu informe a empresa fale de que un 25 % da poboación de Palas de Rei é analfabeta ou non ten estudos, e datos “falsos e ofensivos” semellantes nos concellos de Melide, Santiso e Agolada. Ulloa Viva demandou do goberno galego neste senso “unha desculpa e unha rectificación, porque están a tramitar un proxecto dunha empresa que insulta e minte sobre os veciños e veciñas”.