Última visita guiada á mostra 'É preferible o brillo' de Marta Valverde en Lugo
O vindeiro 30 de maio terá lugar a última visita guiada á mostra É preferible o brillo, da artista Marta Valverde, como peche do seu proceso de residencia artística no espazo Leira, na Praza do Campo de Lugo.
A exposición, froito dun intenso período de investigación e creación, poderá visitarse ata finais de mes con cita previa.
Durante varias semanas, Marta Valverde explorou en Lugo os cruces entre a ritualidade e o confesional, investigando lendas, obxectos protectores e rituais presentes na cidade, e relacionándoos coas prácticas simbólicas actuais como o autocuidado, a astroloxía ou os discursos de benestar.
A artista, natural de Nigrán, conta cunha sólida traxectoria no ámbito audiovisual, combinando documental, ficción e cinema experimental.
A residencia forma parte de Visión Periférica, un ciclo de creación comisariado que foi premiado e financiado polas Axudas INJUVE á Creación, e que ao longo de 2025 traerá a Lugo artistas de diversas disciplinas vinculadas ao audiovisual.
A seguinte residencia xa está en marcha en formato remoto e desenvolverase presencialmente entre o 10 e o 22 de xuño.