Ultiman os traballos de limpeza e consolidación no Castro de Viladonga
No Museo do Castro de Viladonga avanzan os traballos de limpeza e consolidación dirixidos polo arqueólogo Álvaro Pérez. As intervencións xa están a ofrecer resultados relevantes, coa aparición de materiais arqueolóxicos de grande interese, como fusaiolas, doas de vidro e diferentes pezas de cerámica.
Xunto ao equipo técnico colabora tamén un grupo de mozos e mozas participantes no campo de voluntariado organizado pola Dirección Xeral de Xuventude en coordinación coa Dirección Xeral de Patrimonio Cultural. A maioría son descendentes da emigración galega, que atopan nesta experiencia unha oportunidade para reforzar o vínculo coas súas orixes ao tempo que contribúen á recuperación e posta en valor do patrimonio histórico de Galicia.
O público está convidado a achegarse ao castro para coñecer de preto a actividade arqueolóxica. Os traballos rematarán o próximo 6 de setembro.