Un mural de Luís Davila decorará os muros da pasarela de San Roque, en Lugo
Concelleiros lucenses visitaron hoxe a pasarela de San Roque, onde o humorista gráfico, Luís Davila, está a levar a cabo a decoración dos piares da pasarela e o muro da rúa Ramón Montenegro cun mural.
Maite Ferreiro afirmou que “desde a área de Cultura continuamos a traballar na decoración dos espazos urbanos de Lugo con murais realizados por artistas de recoñecida traxectoria, como é o caso de Luís Davila”.
O novo mural da continuidade á actuación realizada nesta zona no ano 2020, cando a área de Cultura realizou un mural sobre o himno galego na escalinata da Ronda das Fontiñas.
Maite Ferreiro lembrou que “desde a Tenencia de Alcaldía do Concello de Lugo apostamos por mellorar a estética desa zona da cidade ao mesmo tempo que rendiamos homenaxe a un símbolo da nosa cultura como é o himno, e ás figuras de Eduardo Pondal e Pascual Veiga, creador da letra e compositor da música, traballando para dar a coñecer o patrimonio cultural de galego e lucense, e que a veciñanza o coñeza e o valore”.
Luís Davila (Pontevedra, 1972) é deseñador e humorista gráfico, recoñecido especialmente polas súas viñetas, publicadas co nome de O Bichero. Estudou na Escola de Artes e Oficios Artísticos Pablo Picasso da Coruña. Na actualidade traballa como viñetista e ten autoeditado varios volumes nos que se compilan os seus mellores debuxos cómicos.