Un vídeo da EPS anima ás mozas a elixir carreiras técnicas e científicas

Lugo

LugoXa

O documento publícase no Día Internacional da Muller e da Nena na Ciencia, e nel participan seis enxeñeiras do campus lucense

11 Feb 2021

Este xoves, día 11 de febreiro, conmemórase o Día Internacional da Muller e da Nena na Ciencia, e con este motivo a Escola Politécnica Superior (EPS) do Campus de Lugo vén de lanzar un vídeo no que anima ás mozas a orientar o seu futuro universitario cara a titulacións de perfil científico e tecnolóxico, fóra dos prexuízos que poidan existir.

O documento audiovisual pode verse xa nas redes sociais do Campus Terra e da USC. Nel recóllese o testemuño de seis enxeñeiras tituladas no centro universitario lucense, que pretenden ofrecer "referentes femininos e actuais" ás nenas e mozas atraídas polas actividade científica e tecnolóxica.

Tamara Arango López, Cecilia Alonso Rego, Guillermina Fernández Villar, María Álvarez Álvarez, Adriana Conde Fernández e María López de la Calle protagonizan este vídeo, no que se converten en embaixadoras das titulacións do ámbito das enxeñarías impartidas na EPS do Campus de Lugo.

Con esta iniciativa, a Comisión de Igualdade de Xénero da EPS pretende "rachar o teito de cristal e os estereotipos en traballos habitualmente vencellados a perfís masculinos para, deste xeito, poder rematar coa discriminación da muller no ámbito laboral".