Usuarios da residencia das Gándaras reclaman á Xunta espazos individuais dignos
Decenas de usuarios da Residencia de Maiores das Gándaras concentráronse na mañá deste sábado, 29 de novembro, ás 10.30 horas, baixo unha intensa choiva, para reclamar á Xunta de Galicia que escoite as súas necesidades no marco das obras de remodelación previstas para o centro, cun investimento de oito millóns de euros.
Os residentes explicaron que non foron informados sobre o alcance do proxecto e que só coñeceron os detalles unha vez iniciado o proceso interno de reorganización de espazos. Segundo denuncian, a nova distribución das habitacións toma como referencia o modelo dos usuarios encamados, o que implicaría eliminar as paredes que actualmente separan algúns cuartos para substituílas por elementos como téxtiles ou plásticos. Consideran que esta solución compromete a intimidade e impide desenvolver actividades cotiás fundamentais, como ler, facer exercicio, escoitar música ou conversar de maneira tranquila cos seus familiares.
As persoas usuarias insisten en que todo residente con capacidade mental e física debe ter dereito a un espazo individual digno, algo que consideran ameazado polo deseño proposto.
O xornal LugoXa, en coordinación coas súas demandas, contactou coa Consellería de Política Social para trasladarlle estas preocupacións, do mesmo modo que fixeron os propios residentes mediante un escrito formal. A resposta remitida pola consellería foi a seguinte: “A residencia pública autonómica das Gándaras está sendo obxecto dunha completa obra de remodelación, que suporán un investimento de 8M€ e que implicarán a reorganización dos espazos do centro. Durante os traballos, tentarase xerar as máis mínimas molestias aos usuarios da residencia, garantindo sempre o seu confort e benestar. Unha vez concluídas as obras, a dirección do centro procederá á reorganización dos espazos, tratando de respectar as preferencias dos usuarios e sempre en función das necesidades dos coidados de cada un deles. Con todo, cómpre lembrar que se trata de prazas públicas ao servizo de todos os galegos e as galegas que o precisen”.
A resposta, interpretada polos residentes como pouco concreta, non afasta as súas preocupacións. Por iso, anuncian que continuarán mobilizándose todos os sábados “ata que alguén lles escoite”.