Usuarios do centro de maiores da Milagrosa visitan a Biblioteca Pública de Lugo no programa Lectura Sénior
Un grupo de usuarios do centro de maiores da Milagrosa realizou unha visita á Biblioteca Pública de Lugo no marco do proxecto Lectura Sénior, unha iniciativa promovida pola Xunta de Galicia co obxectivo de facilitar o acceso dos residentes a recursos culturais e de entretemento adaptados aos seus intereses.
Durante a visita, as persoas participantes puideron coñecer de primeira man os servizos que ofrece a biblioteca e o amplo catálogo de fondos dispoñibles para o público. A actividade contou coa presenza da directora do centro, María Isabel Pérez, así como dos directores territoriais das consellerías de Cultura, Lingua e Xuventude, Manuel Antonio Fernández, e de Política Social e Igualdade, Óscar Viñas.
No marco deste programa, os usuarios recibirán periodicamente na propia residencia préstamos de libros, música, películas e outros materiais seleccionados pola biblioteca en función das súas preferencias persoais. Estas foron previamente recollidas mediante enquisas nas que se determinaron os formatos máis demandados, como libros, audiolibros, cinema ou música, así como as temáticas de maior interese e a frecuencia coa que desexan acceder a estes contidos.
A iniciativa Lectura Sénior busca contribuír á mellora do benestar das persoas maiores, favorecendo a súa inclusión social e estimulando as capacidades cognitivas a través do acceso continuado á cultura.