Valoran positivamente o ciclo de FP Básica en Electricidade e Electrónica no IES de Becerreá
O PP considera unha “boa nova” que se imparta o ciclo de FP Básica en Electricidade e Electrónica no IES de Becerreá, que neste curso 2025/2026 rexistrou 12 matrículas.
Os populares destacan a aposta da Xunta de Galicia e, en concreto, da Consellería de Educación, Ciencia, Universidades e Formación Profesional pola FP, cun dobre obxectivo: ofrecer oportunidades ao alumnado e, ao mesmo tempo, proporcionar formación teórica e práctica en sectores con demanda de profesionais.
O portavoz, José Fernández Carrete, subliña que esta iniciativa representa “unha oportunidade” para o futuro e desenvolvemento de Becerreá, permitindo formar aos mozos e mozas do municipio interesados e atraer alumnado doutros lugares interesado na electricidade e electrónica, que conta con diversas saídas profesionais.
Animou tamén aos estudantes a informarse sobre estas iniciativas que adaptan a formación á realidade da sociedade actual, e agarda que nos próximos cursos se manteña o nivel de matrícula para garantir a continuidade do ciclo.
A FP Básica está dirixida a alumnado en idade de escolarización e permite obter o título de graduado en ESO e o título de Técnico Básico na especialidade correspondente. A Xunta de Galicia ofrece tamén modalidades adaptadas para colectivos vulnerables, adultos e unha nova FP acelerada de catro a seis meses para cubrir a demanda de profesionais de maneira urxente.
No IES de Becerreá impártense o grao básico en Electricidade e Electrónica, mentres que o Centro de Formación e Experimentación Agraria da Alta Montaña ofrece o grao medio en Aproveitamento e conservación do medio natural e o grao superior en Xestión forestal e do medio natural.
Os populares destacan, ademais, o investimento de máis de 17.500 euros na mellora da cuberta do IES dentro do plan Ben-Estar na Escola 2025.