Varias cidades galegas acollerán a XLIII Olimpíada Galega de Química o 13 de marzo
A XLIII Olimpíada Galega de Química terá lugar o 13 de marzo de 2026 nas cidades de A Coruña, Santiago de Compostela, Lugo, Ourense e Vigo e o prazo para formalizar a inscrición remata o 7 de marzo de 2026. As probas desenvolveranse de maneira simultánea nas cinco cidades galegas ese venres 13 ás 16.30 horas.
A edición número corenta e tres rende homenaxe este ano a Pelayo Rubido, profesional vinculado ao ámbito da automoción e fundador do laboratorio de control ambiental Auquilab. A súa traxectoria estivo estreitamente ligada ao impulso e consolidación das Olimpíadas de Química en España, das que foi designado coordinador nacional no ano 1986.
Segundo explica Juan Sanmartín, vicepresidente da Asociación de Químicos de Galicia e coordinador da proba, trátase dunha oportunidade para avaliar os coñecementos na materia, poñer a proba as capacidades do estudantado e avanzar na súa formación académica.
O responsable destaca que o exame require control dos nervios, unha adecuada xestión do tempo, rigor nos razoamentos e claridade na redacción científica, habilidades que resultarán útiles ao longo de toda a traxectoria universitaria e profesional. Na súa opinión, quen participa enfróntase a unha proba esixente nun contexto distinto ao habitual, cun formato semellante ao da PAU e que permite ao alumnado familiarizarse previamente con exercicios competenciais deste tipo.
Pola súa banda, o presidente da entidade e decano do Colexio Oficial de Químicos de Galicia, Manuel Rodríguez Méndez, subliña que esta iniciativa contribúe a fomentar o interese pola química entre a mocidade. Ao seu xuízo, os estudantes que toman parte nestas probas serán no futuro os investigadores chamados a achegar solucións aos novos desafíos científicos e tecnolóxicos, polo que anima ao alumnado galego de bacharelato a sumarse á convocatoria.