Visibilizan a enfermidade do lipedema cunha xornada divulgativa en Lugo
Co obxectivo de dar visibilidade a enfermidade do Lipedema, o Concello de Lugo a través da área de Muller colabora coa Asociación Galega de Linfedema, Lipedema, Insuficiencia Venosa Crónica e outras patoloxías Vasculares Periféricas, AGL, para ofrecer unha mesa redonda, aberta ao público en xeral, no centro Uxío Novoneyra, que terá lugar o luns, día 24, a partir das 19.30 horas.
Tal e como explica a concelleira responsable desta área, a edil Ángeles Novo, “trátase dunha patoloxía moi descoñecida, que afecta ás mulleres e que non ten cura, pero para a que si hai tratamentos que poden paliar os síntomas que presenta. Quixemos ofrecer unha mesa redonda coa asistencia dunha paciente de lipedema, e de varias médicos que poden arroxar luz sobre como tratar esta enfermidade, coincidindo co mes de xuño, dedicado a darlle visibilidade a esta doenza”.
Esta afección distínguese pola acumulación excesiva de graxa en brazos e pernas, e ademais de non ter cura é moi dolorosa. Por este motivo, sinala Ángeles Novo, “é importante saber como se pode paliar a súa sintomatoloxía”. Para iso, na xornada divulgativa prevista para o luns se abordará, da man da paciente Laura Vela Barreiro, a mellora das doentes con esta enfermidade a través dunha adecuada alimentación, con tratamentos de fisioterapia e con cirurxía, para o que se contará coa participación das cirurxiás vascular e plástica, Eva Pérez Carballo e Chus Alvarez Álvarez, respectivamente, xunto á fisioterapeuta especializada no tratamento desta enfermidade Lidia Fuentes Quiroga. Ademais, a mesa redonda estará moderada pola traballadora social da AGL, María Rey Araujo.
De forma paralela, o mesmo luns, na praza Maior, a Asociación Galega de Linfedema, Lipedema e IVC instalará unha mesa informativa para atender a todas as persoas interesadas nos aspectos que rodean a esta enfermidade.