Xa están en marcha os traballos de instalación do novo videomarcador do Pazo
O Pazo dos Deportes de Lugo comezou esta semana a primeira fase para poñer en funcionamento o seu novo videomarcador, un equipamento que permitirá actualizar e modernizar o recinto deportivo cun salto tecnolóxico e visual significativo. Os operarios da empresa adxudicataria traballan desde o luns na colocación de canaletas e soportes que servirán para aloxar e conectar o cableado electrónico, informático e de comunicacións imprescindible para o seu funcionamento.
Segundo o calendario acordado coa área de Ensino e co CB Breogán, a execución distribuirase en varias fases co obxectivo de interferir o mínimo posible na actividade habitual dos equipos que utilizan a instalación. A montaxe das pantallas e o izado da estrutura principal levaranse a cabo os días 12, 13 e 14 de marzo. Nas semanas posteriores completarase a configuración do software e realizaranse as probas técnicas necesarias antes da súa posta en marcha oficial, prevista para a fin de semana do 28 de marzo.
O novo videomarcador estará composto por un prisma rectangular LED de 50 metros cadrados con esquinas curvas, ao que se sumará un anel LED inferior de 8 metros cadrados coa mesma configuración. En total, o sistema contará con 58 metros cadrados de superficie audiovisual, con capacidade para ofrecer contidos en 360 graos e en alta definición, incluíndo repeticións de xogadas, estatísticas, gráficos, publicidade e retransmisións en directo.
A actuación está financiada pola Vicepresidencia da Deputación de Lugo, que destina 266.583 euros á adquisición e instalación deste novo sistema, chamado a reforzar a experiencia do público e a mellorar as prestacións do recinto deportivo.