Xa se pode votar polo cartel que representará a festa do Arde Lucus
A Concellería de Xuventude do Concello de Lugo abriu a votación popular nas redes sociais do Arde Lucus para seleccionar, nunha primeira fase, entre os 64 deseños presentados.
Deste total, a metade dos traballos que obteñan maior respaldo popular, é dicir, 32, pasarán a unha seguinte e última fase, na que un xurado de expertos elixirá o deseño gañador.
Os lucenses poderán votar polo seu cartel favorito ata o vindeiro 14 de abril ás 12:00 horas, xa que a Casa da Xuventude acollerá o 16 de abril, a partir das 11:00 horas, o acto no que se descubrirá a obra escollida para representar o evento de recreación histórica.
Estas instalacións municipais tamén exhibirán durante un mes os 64 deseños aceptados para o concurso deste ano, ao que se presentaron 67 propostas, pero tres foron eliminadas por infringir as bases, xa que eran copias de portadas de libros, carteis doutras festividades nacionais ou foran creadas con intelixencia artificial. O deseño gañador recibirá un premio de 1.900 euros.
O concelleiro de Xuventude, Jorge Bustos, encargado da organización da festa de recreación histórica, destacou "a alta participación de deseños presentados este ano, en comparación cos máis de 50 do ano pasado e os 35 da edición de 2023. Estamos satisfeitos non só polo que supón para a festa en si, senón porque consideramos que é unha moi boa plataforma para darse a coñecer como artista ou deseñador gráfico, cunha gran proxección grazas á internacionalización do Arde Lucus".
Bustos formará parte do xurado xunto cun técnico de Xuventude, aínda que ningún dos dous terá voz nin voto. Serán os demais integrantes do xurado quen decidirán o deseño gañador. Entre eles atópanse profesionais vencellados á ilustración e ao deseño gráfico, un representante da Escola de Arte e Superior de Deseño Ramón Falcón e o arqueólogo municipal do Concello de Lugo, Enrique González.
O cartel seleccionado converterase na imaxe oficial do Arde Lucus deste ano, cumprindo con criterios de deseño, composición estética, orixinalidade, creatividade e calidade artística.