Xantar no Fogar asiste a máis de cen lucenses vulnerables
Coñecer de preto o funcionamento da empresa encargada do servizo de Xantar no Fogar foi o obxectivo da visita realizada pola alcaldesa de Lugo, Paula Alvarellos, á empresa Jardanay, situada en Arteixo, e que desde este ano se ocupa de prestar esta asistencia a máis de cen persoas vulnerables no municipio de Lugo. Cun orzamento de 474.300 euros para os vindeiros dous exercicio, o Concello incrementou a contía deste servizo nun 22,5 % respecto ao ano pasado, incorporando varias melloras como a frecuencia de repartición semanal, de dúas a tres veces á semana; o subministro de 1.000 comidas adicionais, ata 41.460 menús ao ano como mínimo, primando a variedade, a calidade e a adaptación ás dietas.
Paula Alvarellos, que estivo acompañada da edil de Benestar Social e Maiores, Olga López Racamonde, coñeceu de preto a elaboración dos menús, que este ano aumentaron ata ofrecer un mínimo de 41.460 comidas polas 41.296 do pasado exercicio, e no que priman a variedade dos pratos, a calidade dos produtos empregados e a adaptación ás pautas médicas das persoas ás que se presta esta atención. “Para aportar todas estas melloras, -sinalou a alcaldesa-, o Concello de Lugo aumentou o orzamento nun 140% desde 2020, xa que ano a ano se produciu unha maior demanda, primeiro pola pandemia e posteriormente pola crise económica”.
O incremento dos prezos da lista da compra levou ao Concello a esa nova contratación a primeiros de ano dun servizo que presta asistencia a persoas vulnerables, principalmente maiores que viven sós, ou a aquelas que por diferentes motivos físicos, económicos ou sociais precisan desta atención. O novo contrato adxudicado para os próximos dous anos, tamén trouxo consigo outras melloras, ademais das que afectan á repartición semanal e ás mil comidas adicionais ao ano, como son a rotación dos menús a seis semanas, a cesión de pequenas neveiras nos domicilios, en casos de emerxencia social, e a subministración dun litro de leite e outro de zumo á semana.
Para a alcaldesa o máis importante é que este servizo “permítenos mellorar a alimentación das persoas maiores e a súa calidade de vida ao tempo que acadamos que se desenvolvan con autonomía e poidan permanecer nos seus fogares”. A empresa concesionaria prepara cada mañá os pratos, respectando as indicacións sanitarias que recolle o seu historial clínico, manténdose sempre un estrito control sobre a elaboración e a calidade dos ingredientes que deben combinarse dun xeito saudable respectando as pautas médicas que figuran no expediente de cada beneficiario.
Perfil dos usuarios
O perfil maioritario dos usuarios son, en torno ao 60 %, mulleres maiores que viven soas, aínda que no municipio hai unhas 5.000 persoas nesta situación e sobre as que, dende a área de Benestar Social do Concello de Lugo, se realiza un seguimento continuado. Para optar a esta atención hai que estar empadroado en Lugo; ser usuario do servizo municipal de Axuda no Fogar, que complementa ao de xantar, e ser dependente para algunha das actividades básicas da vida diaria que impida a realización das actividades que supoñen a preparación de comidas.
Así, a nova concesionaria elabora os pratos con cociña en frío e envasada con modificación da atmósfera, o que conserva máis tempo os alimentos, as súas propiedades e os seus nutrientes. Neste sentido, Olga López Racamonde sinala que “o Concello pon a disposición das e dos usuarios a súa manutención, cunha dieta equilibrada e acorde ao seu estado de saúde, ademais doutros recursos como a axuda para a realización das tarefas domésticas, a dinamización sociocultural específica e mesmo o acompañamento telefónico para evitar a súa exclusión ou illamento social”.