Xuventude organiza en agosto un curso de skate e BMX
A concellería de Xuventude organizará este mes de agosto un curso gratuíto de iniciación ao skate e BMX a través da programación do +xTi, financiada polo Plan Nacional sobre Drogas do Ministerio de Sanidade. Así o avanzou o responsable da área, Jorge Bustos, quen explicou que se trata dunha “actividade aberta e de balde que non precisa iniscrición previa”.
Estará dirixida preferentemente á mocidade de entre 12 e 35 anos e contará con monitores federados; así mesmo, non será preciso dispor de material, senón que se facilitará no momento de desenvolver a propia actividade. As clases terán lugar no skatepark municipal ubicado a carón do centro comercial As Termas, na rúa Veiga Grande.
Celebraranse os tres primeiros venres e sábados de agosto (4-5, 11-12, e 18-19 de agosto). Os venres o horario será exclusivamente de tarde, de 17:00 a 21:00 horas; mentres que os sábados tamén haberá sesións pola mañá das 11:00 ás 14:00 horas, e pola tarde das 17:00 ás 21:00 horas. Ademais, o sábado 19 haberá unha exhibición aberta ao público ás 17:00 horas.
