A 53ª edición da Festa da Augardente 2025 de Portomarín xa ten cartel e programación
Portomarín prepárase para celebrar a 53ª edición da súa afamada Festa da Augardente 2025, baixo o evocador lema 'Camiño de Auga e Soños'.
Durante os días 19 e 20 de abril, o municipio acollerá unha serie de eventos e actividades que combinarán tradición, música e diversión.
O sábado 19 de abril, a xornada comezará ás 13.00 horas coa inauguración oficial da festa. Ás 14.00 horas será a sesión vermú a cargo da Orquestra Alianza. Á media tarde, ás 17:30 horas terá lugar a IX Carreira Popular "A Carón do Río", un evento deportivo que promete gran participación.
A tradición augardenteira cobrará protagonismo a partir das 18.00 horas coa degustación popular de cóctel solidario realizado con augardente a favor da Asociación Raiolas Lugo e ás 19.30 horas terá lugar a actuación do DJ Nico Vázquez. A Orquestra Aillama actuará ás 22:00 horas para pechar a xornada cunha nova verbena animada.
O domingo 20 de abril as celebracións continuarán comezarán ás 11.00 horas co prendido de Alquitaras na Praza do Camiño e abriranse os postos. Ás 12.00 horas, terá lugar a solemne procesión do Santo Encontro e haberá misa na Igrexa de San Xoán. Xa ás 13.00 horas terá lugar a actuación da Asociación Cultural Río Miño e ás 13.15 horas será o Cabildo Xeral da Orde Serenísima da Alquitara e a recepción dos novos Cabaleiros e Damas que ingresen na Orde.
Pola súa parte, ás 14.00 horas terá lugar o pregón a cargo de Don Miguel Ángel Santalices, presidente do Parlamento de Galicia e ás 17.30 horas actuará a charanga Louband co seu escenario móbil.