A AC Ousadías leva a improvisación ao Club Clavicémbalo cunha nova sesión de Impro Lugo
A asociación cultural AC Ousadías volverá subir ao escenario este xoves 19 ás 22:00 horas no seu espazo habitual, o Club Clavicémbalo, para ofrecer unha nova entrega de Impro Lugo, unha proposta escénica na que o público convértese en protagonista e motor das historias.
A función preséntase como unha experiencia aberta, afastada de guións pechados e normas fixas, na que cada escena xorde das ideas máis sorprendentes e espontáneas das persoas asistentes.
O elenco encárgase de poñer a enerxía e as táboas, mentres que as suxestións do público marcan o rumbo dun espectáculo que se constrúe en tempo real, entre o humor, a creatividade e a complicidade colectiva.
Desde AC Ousadías animan a quen queira prolongar o ambiente festivo do Entroido, pero cun plan máis relaxado, a achegarse a esta cita que promete risas compartidas e situacións inesperadas.