A AECC de Lugo celebra o Día da Cuestación con mesas informativas en toda a cidade
A Asociación Española Contra o Cancro (AECC) en Lugo celebrou o Día da Cuestación cunha ampla mobilización cidadá.
Así, instaláronse decenas de mesas informativas e de recollida de doazóns en distintos puntos da cidade, entre elas na Praza de San Marcos e na explanada da Delegación Territorial da Xunta.
O presidente da Deputación de Lugo, que visitou unha das mesas, destacou a importancia da solidariedade cidadá para continuar avanzando na investigación, na prevención e na atención ás persoas enfermas de cancro.
Tamén puxo en valor o compromiso e esforzo das máis de 150 persoas voluntarias que participaron nesta xornada. A Deputación colabora anualmente coa AECC cunha achega económica de 8.000 euros.
Tamén estiveron presentes o conselleiro de Presidencia, Xustiza e Deportes, Diego Calvo, e o delegado territorial da Xunta en Lugo, Javier Arias, quen visitaron o posto situado diante do edificio da Xunta, acompañados polo presidente da AECC en Lugo, José Manuel Rozas. Durante a súa visita, destacaron que esta iniciativa solidaria serve para visibilizar o labor da entidade, que presta atención integral ás persoas afectadas por cancro e ás súas familias.
Os representantes do Goberno galego lembraron ademais que a Xunta mantén unha colaboración constante coa AECC, cun novo convenio recentemente asinado para impulsar e facer seguimento de plans de prevención, detección temperá e apoio ás persoas con cancro.